ദക്ഷിണാഫ്രിക്കയ്ക്കെതിരായ ഒന്നാം ഏകദിനത്തിൽ സെഞ്ച്വറി നേടിയ വിരാട് കോഹ്‍ലി കുറിച്ചത് അപൂർവ്വ റെക്കോർഡ് നേട്ടം. ക്രിക്കറ്റിന്റെ ഒരു ഫോർമാറ്റിൽ ഏറ്റവും കൂടുതൽ സെഞ്ച്വറി നേട്ടമെന്ന റെക്കോർഡാണ് കോഹ്‍ലി സ്വന്തമാക്കിയത്. ഏകദിന ക്രിക്കറ്റിൽ 52-ാം സെഞ്ച്വറിയാണ് കോഹ്‍ലി ഇന്ന് റാഞ്ചിയിൽ കുറിച്ചത്. ടെസ്റ്റ് ക്രിക്കറ്റിൽ സച്ചിൻ തെണ്ടുൽക്കർ നേടിയ 51 സെഞ്ച്വറിയെന്ന നേട്ടമായിരുന്നു ഇതുവരെ ക്രിക്കറ്റിന്റെ ഒരു ഫോർമാറ്റിൽ ഒരു താരത്തിന്റെ പേരിൽ കുറിയ്ക്കപ്പെട്ട ഉയർന്ന സെഞ്ച്വറി നേട്ടം.
ദക്ഷിണാഫ്രിക്കയ്ക്കെതിരായ ഒന്നാം ഏകദിനത്തിൽ 120 പന്തിൽ 11 ഫോറും ഏഴ് സിക്സറും സഹിതം 135 റൺസുമായാണ് വിരാട് കോഹ്‍ലി പുറത്തായത്. അന്താരാഷ്ട്ര ക്രിക്കറ്റിൽ കോഹ്‍ലിയുടെ 83-ാം സെഞ്ച്വറിയാണിത്. ഏകദിന ക്രിക്കറ്റിൽ കോഹ്‍ലിയുടെ 52-ാം സെഞ്ച്വറിയുമാണിത്. ദക്ഷിണാഫ്രിക്കയ്ക്കെതിരെ ഏകദിന ക്രിക്കറ്റിൽ കൂടുതൽ സെഞ്ച്വറി നേടിയ താരമെന്ന റെക്കോർഡും കോഹ്‍ലി സ്വന്തമാക്കി. ആറ് സെഞ്ച്വറികളാണ് കോഹ്‍ലി ദക്ഷിണാഫ്രിക്കയ്ക്കെതിരെ നേടിയത്.
അതിനിടെ ദക്ഷിണാഫ്രിക്കയ്ക്കെതിരായ ഒന്നാം ഏകദിനത്തിൽ ഇന്ത്യ വമ്പൻ ടോട്ടൽ സ്വന്തമാക്കി. മത്സരത്തിൽ ആദ്യം ബാറ്റ് ചെയ്ത ഇന്ത്യ നിശ്ചിത 50 ഓവറിൽ എട്ട് വിക്കറ്റ് നഷ്ടത്തിൽ 349 റൺസെടുത്തു. വിരാട് കോഹ്‍ലിയുടെ സെഞ്ച്വറിയും രോഹിത് ശർമയുടെയും ക്യാപ്റ്റൻ കെ എൽ രാഹുലിന്റെയും അർദ്ധ സെഞ്ച്വറിയുമാണ് ഇന്ത്യൻ ഇന്നിങ്സിന് കരുത്തായത്.
Content Highlights: Virat Kohli Shatters Sachin Tendulkar's All-Time 'Centuries Record'